Eksprefikso en kelkaj vortoj kun la signifo "malvera, falsa": pseŭdonimo, pseŭdopodo.
"Falsa, malvera, kaŝa". Sufiĉe ofte uzata kiel vera prefikso: sufikso -> pseŭdosufikso(LR.24), scienca -> pseŭdo-scienca(FK.263), laboro -> pseŭdo-laboro(M.138), nomo -> pseŭdonomo = "pseŭdonimo", argumento -> pseŭdoargumento. Zamenhof ofte uzis PSEŬDO kiel veran prefikson, sed estas tamen pli bone uzi KAŜ, ŜAJN kaj FALS en kunmetoj aŭ kiel apartajn vortojn, ĉar tio estas multe pli klara: kaŝnomo, ŝajnsufikso, false scienca, ŝajnlaboro, ŝajnargumento, falsa argumento.
Iafoje oni vidas la A-vorton *pseŭda*. A-vorta formo de PSEŬDO estu tamen pseŭdoa. La "o" estas parto de la radiko, kaj ne povas malaperi. Kaj *pseŭda* kaj pseŭdoa estas superfluaj. Uzu falsa, malvera, kaŝa, ŝajna aŭ iluzia.